Skoðunarferðir um Kárahnjúkasvæðið

Síðastliðin sumur hefur Hugmyndaflug ehf leitast við að aðstoða fólk á Kárahnjúkasvæðinu við að kynna sér sem best bæði mannvirki Kárahnjúkavirkjunar og áhrifasvæði virkjunarinnar. Það hefur verið gert með því að vera fólki innan handar við að velja sér gönguleiðir um svæði sem ekki er hægt að aka inn á, ganga með fólki um botn Hjalladals og Kringilsárrana, veita því upplýsingar um það sem fyrir augu ber og flytja fólk á flugvél yfir Kringilsá og niður á botn Hjalladals.

Fimm gömlum jeppum hefur verið komið fyrir á þremur af fjórum lendingarstöðum til þess að hafa afdrep og birgðir, valta brautir, binda í flugvélar og fara í ökuferðir. Tap af þessu starfi nam hátt í 1,5 milljónum króna í fyrra og í sumar það yfir milljón. En takmarkið er að fólk hafi átt kost á því að kynna sér þessa stærstu framkvæmd Íslandssögunnar á þann hátt sem veitir yfirsýn yfir allar hliðar hennar.

Á Sauðármel, hefur þriggja brauta flugvöllur verið notaður sem aðalbækistöð. Hann er efst í Sauðárdal, um sjö kílómetra fyrir norðan Brúarjökul. Hnit vallarins eru 16 gráður 02 mínútur vestur / 64 gráður 50 mínútur norður. Brautirnar þrjár eru valtaðar og 1400 m NA-SV braut, 1000 m A-V braut og 700 m N-S braut og þrír gamlir jeppar, svo að hægt sé að nota tvo til að binda flugvélar í og þann þriðja til að fara landleið, t. d. norður að gönguleið á vesturbakka Jöklu. Í ca 2 kílómetra fjarlægð frá vellinum eru svonefndir Sauðárhraukar og fallegar tjarnir innan við þá.

Á Hraukahjalla á þeim hluta Kringilsárrana, sem fara á undir Hálslón, er 700 metra merkt og völtuð flugbraut og gamall Ferozajeppi til afdreps og völtunar. Þaðan hefur fólk átt völ á að ganga 300 metra að frábærum útsýnisstað yfir Hjalladal eða allt að 3,5 kílómetra langa leið upp í hina einstæðu Hrauka í Kringilsárrana.

Við Rauðuflúð á botni Hjalladals er 380 metra merkt flugbraut. Í innan við kílómetra fjarlægð frá brautinni til norðurs eru litríkir klettar og stuðlabergshamrar, en við suðurendann er Rauðaflúð þar sem menn hrífast af afli Jöklu í návígi við hana.

Við Snæfellsvegamót (Kárahnjúkavegur/afleggjari að Snæfellsskála) er 500 metra flugbraut og gamall Suzukijeppi til taks.

Reynslan í sumar hefur verið sú að gönguferðir með ferðafólki hafa verið lang tímafrekastar, allt að sex klukkustundir eða 15 kílómetrar á dag. Líka hefur verið ekið frá Sauðármelsflugvelli að gönguleið á vesturbakka Jöklu. Flugvélarnar TF-FRÚ og TF-TAL hafa verið notaðar til að “hoppa” eða selflytja fólk og þá hefur gefist útsýni yfir stíflurnar og Hjalladal.

Í nær öllum tilvikum hefur fólk komið á eigin vegum frá Reykjavík með Flugfélagi Íslands og ekið inn að Snæfellsflugbrautinni eða flugvellinum á Sauðármel. FRÚ-in og TAL-ið voru báðar fyrir austan að mestu 9. – 26. ágúst en þá var báðum flogið til Reykjavíkur. Óvíst er hvenær hægt verður að taka upp þráðinn að nýju þegar þetta er ritað (1. september). TF-TAL er ekki lofthæf sem stendur og eftir er að fljúga boðsferðir með ráðherra og ritstjóra en reynt verður eftir föngum að aðstoða fólk við að kynna sér svæðið þegar veður og aðstæður leyfa.

(Sjá “Áætlunin Örkin”.